بحث في هذه المدونة الإلكترونية

الأربعاء، 22 أغسطس 2018

بنغازي الخير ....




..."..بعد صلاة العصر طلعت من الجامع وقابلني جاري قالي شريت عيد قتله لا والله مازلت ندوّر.. قالي فيه سعي خارجي قالوا توا وصل لمزرعة نوري برحيم في قنفودة وسعرها تقريبا 400 ..بصراحة ترددت في المشية وبين نمشي وبين لا..توكلت على الله وخذيت العيال ومشيت وفي جيبي 340 دينار بس ويعلم الله كيف دبرت فيهن على شان انفرّح العويل...
المهم وصلت للمزرعة لقيت ناس واجدة ومعرفتش لمن نحكي..قابلني العامل سألته تشتغل هنا قالي انعم ،قرّبت منه وقتله بكم الحواله قالي ب 400 لعند 550 قتله ..شوف انا ماعندي الا 340 وبنفرح العويل بحولي حتى صغير،رد وقالي سامحني ياعم ان منش صاحب الرزق انا عامل بس في المزرعة ،ويعلم الله اني انكسفت وانكسفت اكثر لما بنتي الصغيرة قالتلي يابابا كنه العامل ميبيش يعطينا حولي قلتلها فلوسنا ميسدنش وامر الله هيا نطلعوا ..وانا طالع وقريب انطق الباب كلّمني واحد قالي كيف الحواله معجبنكش ..قتله لا والله الحوالى ماشاء الله ..
رد سألني وليش مخذيت مدمهن ماشاء الله..قرّبت منه وقتله فلوسي ناقصات 60 دينار 340 بس والعامل رفض يعطيني بالسعر هضا ..
المهم عرّفني بنفسه وقالي انا نوري برحيم صاحب الرزق ،وتفضل تعال خش واختار اللي يعجبك...
يعلم الله فرحت وقبل حبيت على راسه ورديت مع العيال واخترنا حولي اسباني حقه تقريبا 500 دينار .. عطيته 340 اللي معايا وقتله اول منحصّل باقي المبلغ حنجيبهن لك ...الحق مقصرش وقالي مسامح فيهن الباقي ،طلعنا من المزرعة وحطينا الحولي في السياراة وتوكلت على الله ركّبت العيال وطلعنا وقبل طريق قنفودة ،ولدي البكري يقرا في سنة 1 اعدادي قالي يابابا الراجل حطلي ال 340 في جيبي ..وقالي لما تطلعوا بالسيارة عطيهن لباتك وقوله اشرينا بيهن دبش...عيوني نين دمعن مكنتش متوقع موقف هكي يحصل معايا ..الحمد لله ربي ماينسا حد والارزاق على الله ..
بارك الله فيك يا صاحب الرزق الحاج نوري برحيم وربي ايزيدك.. ويحفظك "
(رواية المهندس Ali Alhony نقلاً عن احد سكان بنغازي قبل العيد بيوم )